Sjølvbetjent Planteutsal

Det sjølvbetjente planteutsalet 2025 har starta. I år byrjar vi ekstra tidleg fordi vi har fått på plass eit lite veksthus som vi sel plantane frå. Ver merksam på at det i Gloppen vanlegvis ikkje er trygt for nattefrost før etter 17. mai. Rabarbra, løpstikke, grasløk, chorogi og dei fleste myntesortane overvintrar ute hos oss så det skal mykje til før dei frys vekk. Vekstar som krev varme (eksempelvis chili, paprika, tomat, duftpelargonium, pepino, sitrongras, søtpotet) må uansett stå i drivhus eller annan oppvarma lys stad.

Ungplantar som tåler litt meir kulde (eksempelvis ungplantar av kål, salat, betar, løkvekstar) kan plantast på friland om ein er litt risikovilleg, men då under fiberduk (evt i kaldbenk). Å plante ut før siste frostnatt er uansett alltid ein risiko, ein må ta vurdere om det er så viktig å kunne hauste tidleg at ein tek sjansen på at noko kan fryse vekk. Vi har ganske bra med dei fleste slag oppalsplantar så det går fint an å vente til etter 17. mai også. Då vil også sortutvalet vere på det største med over 100 ulike grønsaksortar.